Սուրբ Պետրոսի մէջ` 12 ապրիլի արարողութիւնը ուղիղ եթերով։

(Ռատիօ Վատիկան) Կիրակի` 12 ապրիլ 2015-ին, Սուրբ Զատկուայ Բ. կիրակին, առաւօտեան ժամը 9-ին (Հռոմի ժամով) , Վատիկանի Սուրբ Պետրոսի մայր տաճարին մէջ, Ֆրանչիսկոս Սրբազան Քահանայապետը, հանդիսաւոր Սուրբ Պատարագ պիտի մատուցէ` Հայ ծէսի հաւատացեալներուն համար, ի յիշատակ հայ ազգի բիւրաւոր նահատակներուն, որուն ընթացքին  Նորին Սրբութիւնը ` Սուրբ Գրիգոր նարեկացիին պաշտօնապէս պիտի շնորհէ ''Տիեզերական Եկեղեցւոյ վարդապետ''ի տիտղոսը։

Ֆրանչիսկոս Քահանայապետին հետ պիտի համապատարագեն` Տանն Կիլիկիոյ Կաթողիկէ Հայոց Ներսէս Պետրոս ԺԹ Կաթողիկոս Պատրիարքը, կարդինալական դասի անդամներ, հայ կաթողիկէ եկեղեցւոյ սիւնհոդոսական հայրերը եւ Հայ ծէսի պատկանող քահանաները։

Սրբազան արարողութեան ներկայ կը գտնուին իրենց ընկերացող  պատուիրակութիւններով` Ամենայն Հայոց Կաթողիկոս` Գարեգին Բ, Մեծի Տանն Կիլիկիոյ Կաթողիկոս` Արամ Ա, ինչպէս նաեւ  Հայաստանի Հանրապետութեան պետական մէկ պատուիրակութիւն մը Հայաստանի Հանրապետութեան նախագահ` Տիար Սերժ Սարգիսեանի նախագահութեամբ։

Սուրբ զոհին իրենց մասնակցութիւնը պիտի բերեն նաեւ աշխարհի զանազան վայրերէն ժամանած կղերական դասի անդամներ (կաթողիկէ եւ առաքելական զոյգ եկեղեցիներէն)­­, ինչպէս նաեւ Հայաստանէն եւ Սփիւռքի զանազան երկիրներէն բազմահազար հայորդի հաւատացեալներ։

Պատմական այս սուրբ արարողութիւնը պիտի սփռուի ուղիղ եթերով աշխարհի զանազան հեռուստակայաններու միջոցաւ ինչպէս նաեւ Ռատիովատիկանի կայաններէն։

Վատիկանի պաշտօնական Ռատիոյի հայկական բաժինը` յանձն առած է ուղիղ եթերով սփռել Ֆրանչիսկոս Սրբազան Քահանայապետի լատինածէս սուրբ պատարագի  հայերէն լեզուով մեկնաբանութիւնը, որուն կարելի է հետեւիլ հետեւեալ համացանցային կեդրոններու միջոցաւ.

Ռատիովատիկանի կայքէջ www.radiovaticana.va.,

Ռատիոկայանի Youtube-ի կայան` https://www.youtube.com/user/radiovaticanavideo

Վատիկանի հեռուստակայանի Youtube-ի կայան` http://www.ctv.va/